Usalama ni kati ya nguzo muhimu za ustawi na maendeleo ya Iran ya Kiislamu
Ayatullah Khamenei ameyasema hayo leo katika mkutano na makamanda na wakuu wa Jeshi la Polisi la Jamhuri ya Kiislamu ya Iran.
Amesema, usalama maana yake ni "utulivu wa akili wa mtu binafsi na utulivu wa watu wote kijamii" na akaongeza kuwa, unapokosekana usalama, hata kama watu katika jamii watakuwa na nia na uwezo wa kufanya mambo, uwezekano wa kutekeleza harakati mbalimbali za kiuchumi, kiutamaduni, kisiasa na za utoaji huduma hutoweka.
Ayatullah Khamenei amesisitizia nafasi muhimu ya Jeshi la Polisi katika kuleta amani na usalama na akabainisha kuwa kiwango cha uwezo na utayari wa Jeshi la Polisi pamoja na azma na imani ya wafanyakazi wake vinapaswa kuzidishwa siku hadi siku.
Kiongozi Muadhamu wa Mapinduzi ya Kiislamu amesema, amani huwa sababu ya kuongezeka imani za waumini na akafafanua kuwa: "Miongoni mwa nguzo muhimu zaidi za usalama wa Iran ni Jeshi la Polisi; tab'an nguzo hii adhimu ya amani imeundwa na rasilimaliwatu ambao wengi wao ni wafanisi, wenye kuheshimika na wenye kujituma; na kwa hivyo azma, imani, motisha na moyo wa kazi wa askari hao vinapasa viendelee kuimarishwa muda wote."
Amiri Jeshi Mkuu wa vikosi vyote vya ulinzi vya Iran ameashiria pia
mabadiliko ya kasi yanayojiri katika sekta mbalimbali yakiwemo maendeleo
ya sayansi na teknolojia na kusisitizia ulazima wa "kuongeza kiwango
cha utayari na uwezo unaokwenda na wakati", "kuelewa na kutekeleza
majukumu kikamilifu" na "kuwabainishia kwa makini wananchi katika vyombo
vya habari kazi na huduma zinazotolewa" kwa ajili ya kudhamini na
kustawisha amani na usalama nchini.
